Ацеремониа рхы аладырхәит иара убас амаҵурахьы ҿыц инеиз аруаа рыдҵаҟаҵаҩцәа, урҭ рҭаацәеи рҩызцәеи.
Иабжьгаратә ажәахә аҿы аинрал-маиор Дмитри Дбар, арратә ҭоуба ашьҭаҵара амш дарбанызаалак ахаҵа иԥсҭазаараҿы иҷыдоу аҭыԥ ааннакылоит ҳәа инаҵшьны иаазгәеиҭеит.
«Аҩызцәа асолдатцәа, иахьатәи амш- шәыԥсҭазаара аҿы акырӡа зҵазкуа амшқәа иреиуоуп. Шәыдҵаҟаҵаҩцәа, шәҭаацәа, шәҩызцәа ирбо-ираҳауа Шәара иахьа Шәыԥсадгьыл шәыуаажәлари рхақәиҭреи рхьыԥшымреи рзы хьыӡла-ԥшала арратә уалԥшьа анагӡара шалшәыршо азы ҭоуба жәуит. Агәра ганы ҳаҟоуп, Аԥсадгьыл ахьчаҩцәа шәрылагыло, Шәара хьыӡла -ԥшала шәуалԥшьа шынашәыгӡо! Агәымшәареи агәаӷьреи раарԥшра шәазхиаз!», - ҳәа иҳәеит аинрал-маиор Дмитри Дбар.
Арратә ҭоуба аҟаҵара ашьҭахь, амаҵурахьы ҿыц инеиз аруаа шьаҿеиқә́шәала ииасит, реибашьратә зыҟаҵара, ацәаҳәақәгыларатә, аиҭақәыргыларатә лшарақәа аадырԥшит, ражәахьа рҳәеит, иара убас рыдҵаҟаҵаҩцәа ирырҭоз еиуеиԥшым арратә хыдҵақәа нарыгӡеит.
